Jawaban:
Dewa Ruci (Bima Suci)
Penjelasan:
Ing Astina, Prabu Duryudana lan para Sata Kurawa saha Patih Sengkuni tansah ngupadi kepiye carane kanggo nguwali kekuataning para Pandhawa luwih-luwih bisa nyingkirake para Pandhawa. Banjur Patih Sengkuni njaluk tulung marang Pandita Druna supaya ngreka daya patine panenggak Pandhawa yaiku Bratasena, amarga Patih Sengkuni lan para Kurawa percaya yen ta Bratasena mati mangka kekuataning Pandhawa bakale entek lan manehe Bratasena anggone ngurmati Pandita Druna ngasi apa wae kang dikandhakake Pandita Druna mesthi dipercaya dening Bratasena. Pandita Druna banjur ngutus Bratasena kanggo nggoleki Tirta Amerta Pawitra Sari kanggo nggayuh kasampurnaning badan kang manggon ana ing Alas Tribasara ing tengah guwa kang manggon ing Gunung Candramuka, sakjane Tirta Amerta Pawitra Sari iku ora ana wujude ing dunya ananging Bratasena percaya yen ta apa kang dikandhakake dening gurune iku mesthi anane. Bratasena banjur pamit marang keluargane yaiku para Pandhawa lan ibune yaiku Kunthi Talibrata.
Bratasena kang wus ana ing Alas Tribasara ora bisa nemokake wujud e banyu suci, alas diobrak-abrik lan banjur mlebu guwa lan pethuk raseksa loro yaiku Rukmuka lan Rukmakala. Raseksa loro katon ora seneng karo Bratasena lan kedadeyan gegeran ing antaraning Bratasena lan raseksa kekalih. Rukmuka lan Rumakala dicandhak banjur dikeprukake siji klawan sijine lan malih dadi Bathara Indra lan Bathara Bayu. Dewa loro banjur paring wejangan marang Bratasena yen ta banyu suci kang digoleki Bratasena ora ana ing alas kono, Bratasena diutus supaya mulih lan takon marang Resi Druna ing ngendi saktemene dununge banyu suci iku mau. Bratasena ngesthokake dhawuh dewa kekalih lan bali menyang Astina.
Ing Astina, para nayaka kang padha ngumpul wes percaya yen ta Bratasena bakale mati, dumadakan Bratasena jedhul lan kabeh ingkang sowan kaget weruh wujude Bratasena sing isik wutuh tanpa ana cacat. Bratasena kandha marang Resi Druna yen ta Tirta Amerta ora ana ing Alas Tribasara. Resi Druna ngendha yen ta Bratasena mung dijajal kekuatane lan mangsuli yen Tirta Amerta iku manggon ana ing telenging samudra. Bratasena ngesthokake dhawuh Resi Druna banjur budhal menyang telenging samudra.
Ing Ngamarta, para Pandhawa sedhih atine amarga ngrumangsani yen ta Bratasena iku diapusi lan diarah patine dening Kurawa. Prabu Kresna ingkang kebeneran lagi sowan marak ing Ngamarta paring dhawuh yen ta Bratasena ora bakal mati malah bakale nggawa katentreman marang Ngamarta.
Bratasena kang wus ana ing pesisir samudra mangu-mangu atine, ananging tekate kanggo nggayuh kautaman bisa ngalahake rasa mangu-mangu kang ana ing njero atine. Sakliyane iku, Bratasena wis sumpah pilih mati tinimbang bali ora ngesthokake kang wus dadi dhawuhe gurune. Bratasena banjur mlumpat lan njegur ana ing samudra.
Ing tengahing segara Bratasena digubet dening naga kang gedhe, digubet nganti ora bisa nyapo-nyapo, Bratasena kelingan marang sanjatane yaiku Kuku Pancanaka, Bratasena ethok-ethok lemes supaya naga mau rodok nguwali anggone gubet banjur Kuku Pancanaka ditamakake ana telaking naga kang nyebabake patine naga mau.
Sakwise patine naga mau ana cahya sumunar ing telenging samudra, Bratasena banjur nyedhaki cahya kuwi mau, katon ana bocah cilik kang ngaku dewa, Bratasena lemes najur ndhoprok ing ngarepe bocah kuwi mau. Bratasena kang selawase urip ora bisa ndhodhok banjur ndhodhok ing ngarepe bocah cilik. Bocah cilik mau banjur ngendika yen ta sejatine dheweke iku dewa kang jejuluk Dewa Ruci. dewa Ruci kuwi dudu dewa kang bisa didelok dening sembarang titah ananging mung bisa didelok dening Bratasena amarga Dewa Ruci kuwi mau yaiku sejatining si Bratasena.
Bratasena bingung apa kang dikarepake dening Dewa Ruci. Durung sempet mangerteni apa kang dikarepake Dewa ruci, Bratasena tambah bingung nalika didhawuhi mlebu ana talingane Dewa Ruci, Bratasena takon "kula niki ageng, panjenengan niku alit, menapa cekap menawi kula mlebet wonten talinganipun panjenengan?". Dewa Ruci ngguyu lan dhawuhi Bratasena supaya percaya marang dhawuhe Dewa Ruci.
